सरकारी जग्गा व्यक्तिका नाममा ल्याउने तत्कालीन नापी निरीक्षक ध्रुवराज मरासिनी विरुद्ध भ्रष्टाचार आरोपमा मुद्धा दायर।

अख्तियार दुरुपयोग अनुसन्धान आयोगले नापी कार्यालय बुटवल, रुपन्देहीका तत्कालिन नापी निरीक्षक ध्रुवराज मरासिनीसमेत ५ जना उपर गैरकानूनी लाभ तथा हानी एवं सरकारी कागजात सच्याई भ्रष्टाचार गरेको सम्बन्धी आरोपमा आज मुद्धा दायर गरेको छ ।

नापी कार्यालय बुटवल रुपन्देहीका तत्कालीन नापी निरीक्षक ध्रुवराज मरासिनीसमेत ५ जनाविरुद्ध भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगले सोमबार विशेष अदालतमा भ्रटाचार मुद्दा दायर गरेको हो।

सरकारी कागजात सच्याई गैरकानुनी लाभ लिएको आरोपमा उनीहरुविरुद्द भ्रष्टाचार मुद्दा चलाइएको छ। नापी निरीक्षक मरासिनीसहित तत्कालीन सर्वेक्षक शिवनाथ मण्डल, तत्कालीन अमिन शौकत अलि खाँ, जग्गाधनी नन्दबहादुर कालाथापा र मानबहादुर श्रेष्ठविरुद्ध भ्रष्टाचार मुद्दा दायर भएको हो।

बुटवल उपमहानगरपालिका–१३ को सार्वजनिक जग्गा बुटवल क्षेत्र हेर्ने नापी कार्यालयका अमिनले अन्य जग्गाधनीहरुसँग मिलेमतो गरी उक्त जग्गा फिल्डमा नभएको जानकारी गराएको भन्दै अख्तियारमा उजुरी परेपछि छानबिन सुरु भएको थियो।

सो क्रममा सार्वजनिक जग्गा व्यक्तिको नाममा कायम गराएर भ्रष्टाचार गरेको पाइएपछि उनीहरुविरुद्ध मुद्दा दायर भएको अख्तियारले जनाएको छ। तत्कालीन नापी निरीक्षक मरासिनीले सार्वजनिक बाटो कायम रहेको किता नम्बर ४८६३ को जग्गालाई २०६३ असोज २९ गते ट्रेस नक्सा तयार गर्दै कित्ताकाट गरी कित्ता नम्बर ५९७८ र ५९७९ कायम गराउका थिए।

कायम हुन आएको कित्ता नम्बर ५९७९ लाई साविक जग्गाधनी कै नाउँमा कायम गरिएको तर कित्ता नम्बर ५९७८ लाई फाईल नक्सा नम्बर ५९८ मा पारी साविकका जग्गाधनी हुँदै हालका जग्गाधनीलाई बिक्री गरिएको थियो। यसरी सार्वजनिक बाटो रहेको जग्गालाई कित्ताकाट गरी व्यक्ति विशेषमा दर्ता गरी भ्रष्टाचार गरेको पाइएपछि उनीहरुविरुद्ध मुद्दा दायर गरिएको हो।

सरकारी नक्सा नम्बरसमेत फरक पारी कित्ता नम्बर ३०४७ लाई फिल्डबाट नै गायब गराउने गरी प्रमाणित गर्ने कार्य समेत भएको पाइएको छ।