अनलाइन मार्फत क्यासिनो खेल खेलाउने चारजना पक्राउ

क्यास एपलगायतका एप्लिकेसनमार्फत हारजित हुने गरी अनलाइन क्यासिनो खेलाएको अभियोगमा प्रहरीले तीन महिला र एक पुरुष गरी चारजनालाई पक्राउ गरी आज सार्वजनिक गरेको छ। 

पक्राउ पर्नेमा काठमाडौं महानगरपालिका– ७ चाबहिल बस्ने काभ्रेपलाञ्चोकको मण्डनदेउपुर नगरपालिका– १० घर भएकी २६ वर्षीया सरिता लामा, सिन्धुपाल्चोकको थाङपाल गाउँपालिका– ८ घर भएकी २५ वर्षीया सारंगा गुरुङ, काठमाडौंको गोकर्णेश्वर नगरपालिका– ८ बेसीगाउँ बस्ने खोटाङको बाहुनीडाँडा गाउँपालिका– ६ घर भएकी २३ वर्षीया पूर्णिमा राई र काठमाडौंको गोकर्णेश्वर– ४ नामगेल बस्ने नुवाकोटको शिवपुर गाउँपालिका– १ घर भएका २८ वर्षीय तेम्बा लामा रहेको काठमाडौं उपत्यका अपराध अनुसन्धान कार्यालयका प्रवक्ता तथा प्रहरी उपरीक्षक रवीन्द्र रेग्मीले जानकारी दिए। 

उनका अनुसार विभिन्न खेलमा अनलाइनमार्फत बाजी राख्दा जितिन्छ भन्ने विश्वास दिलाई हारजित हुने र आफूले लाभ लिने उद्देश्य राखी रकमको बाजी राख्न लगाई सट्टाबाजी गराई खेल खेलाउने गरेको भन्ने सूचनाका आधारमा उनीहरूलाई पक्राउ गरी आज सार्वजनिक गरिएको हो।

पक्राउ परेकाहरूका साथबाट अनलाइन ‘गेम’ खेलाउन प्रयोग भएका ल्यापटप पाँच र मोबाइल ११ सहित उपत्यकाका विभिन्न स्थानबाट पक्राउ गरिएको काठमाडौं उपत्यका अपराध अनुसन्धान कार्यालयले जनाएको छ। चारैजनालाई आवश्यक कारबाहीका लागि जिल्ला प्रहरी परिसर टेकु पठाइएको प्रवक्ता रेग्मीले बताए।